Kalawakawak




Makitam kadi dagitoy nga adigik
Isu't mangtengtengel tapno makunaak a sibubukel.
Umayka! Umasidegka tapno imutektekanak, 
Riknaem dagitoy a diding a naitapkal kaniak
Tapno isu't mangsarsarapa iti bara ken lamiis
Manipud iti akinruar a puersa.
Dagiti kortina nga uray napirpiranen, ay-ayamen latta ti angin.
Maikarawam pay ngata dagiti ramaymo ditoy uneg?
Tapno pasgedam ti pagsaingan
Ket ipintana manen ti anniniwanmo ditoy barukongko.

Adda dagiti kanito a kayatkon a maminpinsan nga iserra 
ti ridaw ken ibalunet dagiti tawa,
Pagtalinaeden ti ulimek. 
Ngem diak malapdan a lagipen dagiti danapegmo, 
Wenno dagiti agallangogan a pagaakmo.
Ken ti anangsabmo no umulika iti maikadua a kadsaaran.
Napanunotmo kadi no ti ridaw ket awanan iti balunet? 
Wenno dapan a sumrek?
Kalawakawak ngem agang-anges ti adigik manipud ruar anginggat’ uneg.
Sitatakderak nga agur-uray.
Sitatalinaed latta ti bara ti katrek, 
agat’ pay-ud latta ti maysa a balay.
Uray no kasanot’ kaunday ti kinaawanmo 
Wenno sadinno man a datar ti napayatam.
Uray mano nga angin ti nanggungon kaniak 
Ken mano nga amaris ken nepnep ti natnag iti atepko.
Uray pay nagtubon dagiti ruot ditoy diding. 
Pinasantak ti panagtutudo ken nilaylay iti isasangpet ti kalgaw, 
agurayakto latta.

Diam kasapulan a kaemen dagiti dakulapmo tapno agtoktokka.
Ta bay-ak ti angin nga iduronna ti ridawko 
A kas pammadayaw iti kaadam.
No laeng koma addaan biag dagiti didingko.
Amangan ta agarasaas, aglaaw ket agkatawada koma 
Sada bulosan ti anges manipud iti barukongda.
Iyistoriada ti pakasaritaanta 
Kadagiti al-alia iti ruar sakbay a dumteng ti bannawag.

Kailiwmo kadi dagitoy diding, ti agkubkublang nga atep, 
dagitoy adigi a kinarayaman ti estranghero a ruot?
Itak laeng a maanag ti kinapateg ti balay a maawidan tapno maturogan.
Agur-urayak iti laksid ti kinangayed, addaak ditoy, 
Kalawakaw a balay, agur-uray iti panagsublim.


- Abril 14, 2013
(diak kukua ti ladawan)
Post a Comment

Popular Posts