Pannakabuong



Adda dagiti sumagmamano a banag
a kanito laeng ti makaibaga ken padas iti mangipalagip.
Umuna ken kaut-uotan kadagitoy ket ti pannakabuong.
Pannakabuong a kas maysa a baso
a maiwarsi iti sementado a suelo,
awanan rima ken awanan ti masinunuo a rason.
Di manamnama a dagitoy a naiwarsi a parte
ket nagtalinaedda iti lagip.

Ket daytoy nga aldaw,
kasapulan a pidutem dagiti babassit a sipang.
Saggaysaen a pagsasaipen dagiti genna ken birri,
dalusan dagiti natakem nga iking tapno pigketan,
isubli a sibubuo nga uray di mapaglunit
ti kinadaksanggasat ti pannakatnag,
mapagtalinaed a sibubuo


Amintayo ket addaan pannakatnag.
Mabuong ket mabuongto manen.
Ket no makita ti bagi manipud iti raniag
dagiti naiwarsi a banag di a masdaaw ta datayo dayta,
addaan iti agduduma a rupa a no matiruan iti silnag
mangiburay iti ad-adu a lawag.
Ti tunggal parte a mapidut,
makissayan ti anninaw.
Mapagkaysa agingga a maymaysa ti nakasango kadatayo.


-Feb 24, 2013
(diak kukua ti ladawan)

Sarsarita - 021913



Ti kape ket samo laeng maramanan ti imasna no ikiwarmo a nasayaat, kasta met ti biag, naimas daytoy no malaokan iti pait ti nasam-it.

-February 19, 2013

Iti Pila

Ita nga aldaw ket kadawyan laeng
 a kas iti pannakapirsay ti panid
ti kalendario iti diding iti napalpalabas,
agtangep dagiti ridaw
nga itay bigat ket sidadaan
a mangallawat kadagiti dumteng,
mapagpag ti tunggal pigad
a naglak-am ti pannakailuges
manipud iti sapatos, sinelas ken dapan
a di ammo no nagguapuananna,
basta ti ammok intunda ida
ti agduduma a deppaar
tapno makirinnapok, makipinnatangken,
makipinnakidser iti panagtatakder.


 (February 12,2013)
*diak kukua ti ladawan*

Sarsarita - 020313

ang pagbabago ay walang palugit o deadline dumarating ng wala sa tamang panahon at tamang oras.