Dagiti Dekorasion


Pinayapayan ni Nana Merced ti serbidora tapno ipakwentana no mano ti bayadanda iti naorderda.  Situtudio nga immasideg ti balasang nga iti panangtantia ti baket apagsagpatna pay laeng iti viente anos. Iti panagdardarasna, nasagidna ti plorera a nakaikabilan dagiti sabsabong. Nakaparabaw daytoy iti dibision tapno di makapagsinnirip dagiti dadduma a customer. Napataliaw amin a tao iti pannakabuong ti plorera iti sementado a suelo. Nagparsiak ti danum. Naimatangan ni Nana Merced ti panagbuteng iti rupa ti balasang. Ti natagari itay nga aglawlaw, nagulimek apagbiit. Insigida met nga immasideg ti superbisora ti panganan. Nakakuretret ti mugingna.

"Inka mangala iti pangkaykaymo tapno di maiwara dagiti babassit a banag ket di masugatan dagiti kustomer tayo. Inton maminsan, tanangem ti garawmo ta saan laeng a makadadaelka kadagiti banag nga adda ditoy uneg ngem amangan ta makadangranka pay." Naalumamay nga inmandar ti babai iti serbidora.

"Ma'am, pasensiaanyon daydiay taomi. Baro pay laeng gamin daydiay ditoy," panangpadispensar ti superbisora.

"Dina met ingagara ti pannakasagidna iti plorera. Linisianna laeng ti siko ti maysa a kustomeryo a madungparna koma ngem sabali met ti nasagidna. Ammok iti kabayagko a kustomeryo ditoy, idi pay laeng a makitkitak dagita a plorera. Kataengandan daytoy a restoranyo."

"Wen, ma'am."

"Iramanmo lattan no mano ti balor dayta a plorera iti bayadanmi. Kaasi met dayta serbidorayo no ikissayyo iti sueldona. Wen gayam pakibalkot daytoy dadduma a teddami, a." Insampitaw ni Tata Carias.

Madama a sagsagadan ti serbidora dagiti babassit a parte ti nabuong a plorera idi immasideg agraman ti akinkua ti restoran.

"Ay, saan, a, sir. Tapno agnakem ket dinanto ulitenen." kinuna manen ti superbisora.

"Diam tagisayangen dagiti dekorasion nga adda ditoy ta amin dagita ket pangpapintas laeng tapno ngumayed ti uneg daytoy a restoran. Aglalo ket tapno maikkanyo ti makapnek a panagserbi dagiti kustomeryo, ti kinaalerto ti maysa a puonanyo, ti panagdardaras. Maysan nga adigi daytoy a restoran, uray no mabuong wenno masuktanto aminen a linaonna daytoy a restoran, kanayonto latta nga umay dayuen dagiti tao, saan a dagiti dekorasion ti umayda a rantaen no ketdi ti iserserbiyo a dekalidad a taraon." Innayon ni Nana Merced.

Napanganga ti superbisora.

"Bay-am lattan." Kinuna ti akinkua ti restoran iti superbisorana.


- June 23, 2013




Sarsarita - 061713



Ti maysa a bunga
ket kasapulan a sumina
manipud iti sanga
tapno makaparnuay iti baro a mula.

Sarsarita - 061613



Kasla tudo ta nga agsupadi, 
maysaak a positibo (+) 
sika ket negatibo (-), 
iti tunggal agdekketta 
mangparnuayta iti gurruod ken kimat.


(diak kukua ti ladawan)

Sarsarita - 061413



No kayatmo ti dumket iti kudilko, tuladem koma ti lamok a sumayengseng sakbay nga agdisso tapno agpakada. Ta no diam inaramid dayta, amangan ta marim-itka.


(diak kukua ti ladawan)

Da'ta ti Pakasaritaan




Naidumduma dagiti dakulap
Diak ammo no ania wenno apay ken no sadino ti naggapuanda
Ngem makatugawak, mamatiak ken mabuyak
Dagiti ramay nga aggaraw tapno mangpartuat
Iti naidumduma a banag manipud iti awan
Agkumpas iti angin tapno iladawan ken biagenda ti sao
a tumpuar kadagiti bibig.

Adda dagiti pakasaritaan, adu a pakasaritaan ti kumuretreten a dakulap
Ken ti apagbingi nga isem no kasta nga agpilko ket agsabat
ti tammudo ken tangan.
Adda kadi makuna ti dakulap no kasta nga in-inut nga agkaem
Ti nagurdo, piniglat ken kuretretan a ramay.
Kaano kadi a dagiti ramay ket lumapsut manipud iti punguapunguan
Tapno agkedked uray iti maudi laengen a gubat ti panaglakay,
mapasamak ngata ti pakasaritaan?
Dagitoy a dakulap ket mapuoran, marunot, agrupsa
Ket agbalin a kas maysa a tapok.

Da'ta ti rurog! A no kaano a ti pambar ket agmawmaw
Ket dagiti maris ti biag aglingeda kadagiti kukota.
Da'ta dagiti ramay, natangken ngem nalamuyot
napigsa ngem nalukneng.
Da'ta! Ket kasla met kadakuada a naaramid
Tapno mangbiag a mangiggem tapno iladawan
Ken isurat, ipinta nga awanan iti tinta iti kambas
Ti lamolamo a kudil.

Denggem dagitoy sao dagiti dakulapko
Tapno tuntonennna ti liniam,
Denggem dagiti arasaas manipud iti pilid
Ti idurduronko a nagtugawam.
Dagitoy dakulapko ti mangisawang ti pakasaritaan.
Agpapan pay ita, diak maawatan no ania ngata ti ibagbaga
Ti dakulapko iti dakulapmo no agtugmok dagiti ramayta
Ket maipulipol iti sibetmo a buyaenta
Ti suripet manipud iti balkonahe.


-June 8, 2013
(diak kukua ti ladawan)

Sarsarita - 060413



uray ti maysa kayo ket dina maipadto no agbalinto a nalinteg ngem maipanamnama dumakkel daytoy iti panaglabas ti panawen.

(diak kukua ti ladawan)