Panangipadigo


Mangrugin nga agsaknap ti sipnget idi dumanon dagiti agassawa iti balayda. Bimmaba nga immuna ni Nana Merced tapno warwarenna ti naiputipot a kandado iti tarangkaan. Winadaanna ti agsumbangir a parte daytoy tapno nalaka a makaserrek ti lugan a manmanehuan ni Tata Carias.

"Lakay, makaamokan a mangisarado kadayta tarangkaan ta innak biit mangipisok." impakada ni Nana Merced iti lakayna. Imbatida gamin amin ti naisupot itay kada Indong ken ti anakna.

Isarado koma ni Tata Carias ti tarangkaan idi mapasungadanna ti maysa a dyip a nakasilaw ti headlaytna. Naglaon iti agduduma a karga. Pati ti bubungan daytoy ket napnapno iti ramramit nga aplayanses kada tugtugaw.

"Amangan ta dayta diay ibagbagada a baro a pamilia nga agupa." Naitanamitimna. Napan gaminen sadiay Amerika ti akinkukua ti kaabayda a balay. Ket ti laeng kabagian daytoy ti mangkitkita. Imbes a bay-anda a nakatiwangwang ket pinaupaanda latta tapno uray kano kaskasano adda mangkitkita ken mangdaldalus iti aglawlaw.

Bimmaba ti pangisiten a lalaki nga addaan iti natangos nga agong. Maripar manipud iti bumbilia ti silaw ti lugan ti langana. Paunegen dagiti matana sa pimmarintumeng dagiti kurimatmat daytoy. Kulutan ti nangisit a buokna ken dagiti takiag daytoy ket napnuan met iti barbon. Kas kuna ti maysa a karrubada, pamilia kano ti Indiano dagitoy. Wenno Bumbay a kuna ti kaaduan. Iniseman ni Tata Carias daytoy ket simmubad met ti isem.

Idi mangrugida nga agiyuneg iti karga dagitoy ket nakitinnulong met ti lakay. Permi ti yamyamanda kenkuana idi malpas.

"Ditoy kayo a manganen, manong!" Inyawis ni Anand, dayta ti nagan nga imbagana. Mangrugin nga agattibuor ti angot ti agburburek a lutlutuen ti baketna a ni Asha. Angot ti malutluto a curry daytoy. Manok tay nakita ni Tata Carias itay a binuguanna. Nupay agsidsida met ti lakay iti adda curryna ngem kasla sabali daytoy ita kenkuana ta sumuknor iti agongna. Makababaengen koma.

"Saanen ket nagluto met ni baket. Inton maminsanen." Impakadana sa timmalikud. Intulnog dagiti dua nga ubbing daytoy nga anak ti agassawa iti ridaw.

Rumrummuaren ti kabus a bulan manipud iti daya. Sumirsirip kadagiti bulong ti akasia iti arubayanda. Naragsak daytoy a nakaisem. Mangiparparangarang iti baro a namnama para iti kaak-akar.

Iti iseserekna iti tarangkaan, nasabetna ni Nana Merced nga adda nakatapaya a nakalluban a pinggan iti dua a dakulapna. Pamiliar kenkuana ti angot met ti agat-bugguong.

"Pangipanam kadayta?"

"Innak padiguan dagita kaak-akar, a. Ayabanka koma itayen a mangan ngem nakitak a tumultulongka pay kadakuada isu a dikan inistorbo."

"Kayatda ngata dayta?"

"Ket amman met ngata." Simrek ni Tata Carias apaman a nakaruar ti baket. Napanna binakkug dagiti nakalluban a pingngan tapno sumango iti lamisaan.

"Ne, adda impadigoda." Nakargaan met laeng ti pinggan iti sabali a sida. Uppat a katagbat a parte ti manok nga addaan iti napalet a digo.

"Kasla met naimas." Apaman a naidisso iti lamisaan ket nangkutsara sana inyabay iti pingganna a nakargaan iti pinakbet.

Ita dinan mapagdasig ti angot ti bugguong ken curry ta sangsangkamaysadan iti ngiwatna.

-October 28, 2013


Prosa - 102213

Adda met panawen a kasapulam ti agbatay nga agmaymaysa. Maysa nga aweng kenka ti uni dagiti payyak a pimmanaw. Suotennaka ti angin iti kinaagmaymaysam iti pagbatbatayam a kable. Dita a tantiaenna ti kinaandurmo, no kasano ti kinapigsam a kumpet iti kable, no kasano a salaam ti panangsutilna kenka. Ti napateg la unay dika paatiw iti puyopoyna.

Prosa - 101113


Ti panagsangit ket saan a klase ti kinalupoy ngem ketdi maysa a pangiruaran iti saem tapno uray kaskasano ket mapaglag-an no di man maagasan ti karkargaen ti barukong.

Prosa - 100813



Ammok ti karirikna ti dimmapo
nga ulep a nagtubo manipud iti awan
tapno umayna langeban
ti rupa ti tangatang nga ayan
ti lawag nga idi pay sapsapulem.
Ammok sumangpetka,
maysa a nalamiis nga angin.

Sarsarita - 093013



Tangtangadek nga inaldaw dagiti billit a lablabsak,
nakaparabawda manipud iti kable ti koriente,
damdamagek iti bagik ania ngata no maysaak kadakuada?
ania ngata ti rikna ti addaan payyak?
iti tunggal panagtangadko,
agdumogda met
ket buyaenda
ti tunggal aksawko.


(diak kukua ti ladawan)