Skip to main content

Posts

Showing posts from 2014

SILAP

Agawidakon manipud iti panakipagkita iti maysa a tao a mangiprosproseso iti building permit ti plano idi madalanak ti maysa nga aglaklako ti peanut butter iti igid ti kalye ti Karuhatan. Medyo dakkel ti lakona a naksiled iti plastik a garapon. Dinamagko ket kinuna a dina kano kukua. Kukua kano ti maysa nga empleyado it I uneg ti pawnshop. Binitbitko ti maysa ket napanak iti uneg. Tinawarak ket intedna iti 150. Nangiruarak ti pinapel a 200 ket sinupliannak met laeng iti pinapel.

"Dayta laeng kadi ti gatangem?", kinunana.

"Adda pay lakom, aya, a sabali?" dinamagko met.

"Ket gumatangkan kadagitoy alahas."

Idik laeng a nasaripatpatan dagiti agduduma a klase ti alahas a naremata ket nasiledda iti eskaparate. Adda singsing, aritos, kwentas, polseras. Aggi-innagawda iti silap iti tunggal maysa a kas pangipasindayag iti kabukbukodanda.

"Mabalin a tintinnagan." Innayon ti babai a pangallukoy.

"Kasano daydiay?" Inimtuodko ta itaak laeng a makakita iti…

SIDA

Gapu ta "inasal" a manok idi kalman ti aldaw ti sindak ken "tinola" a manok iti pinangrabii sa manen "naprito" a manok ita a bigat, ket awanen ti maibagak. Kurangko laengen ti payyak tapno tumayabak. 

Ngem apay pay nga agreklamoak ket dagiti dadduma ket awan ti masidada. Agsidada pay iti innapuy. Ta masida kadi ti innapuy? Wen, a, ta pagtulidtuliden ti innapuy iti innapuy met laeng. Wenno agsidada iti asin ken bugguong.

Kas met kadakami nga agkakabsat idi ubbingkami. Manteka ken bugguong a naipatarayutoy iti labay. No addan sardinas idi ket maysa daytan a makuna a fiesta. Aglalo no malaokan iti bulong ti marunggi. Alla ket kailiwko metten dayta, agpalutoakto man kenni Mamang. Kayatko a sublian dayta. Ta saan laeng a kanayon a manok. Tumayabak ulit iti nakairuamak. - # Oct 14, 2014

BOSS

No babaika ket sika ti akinkukua iti maysa a pagtrabahuan, ania ngata ti awagda kenka "boss" met laeng a kas pangawagda kadagiti lalaki? 

Dayta man to napaliiwko itay napannak nagitulod iti bombilia a maaramat iti maysa nga event sadiay SMX. 

Boss ti awagda iti maysa a babai a no kitkitaen ti langana ket kasla bagbagkatenna ti lubong. Nakakuretret ti mugingna. Addaan iti puli ti chinese. Ta no miraen ti matana ket singkit ngem no kudil ti pagsasaritaan amangan ta agpada kami laeng. Nauyong a kas natural nga ugali ti maysa a boss. Agallangogan ti timekna iti pakabuklan ti pasdek a no tantiaen ket umanay ti sangapulo a basketball court.

Bumugkaw kadagiti taona a puros bin-ig agtutubo. Diak la ammo no dagitoy ket addaandan iti 18 a tawen. Nararapisda ken tinubbuan ti taramidong dagiti kaadduan kadakuada. Agkakatawa a kasla nabibinegdan iti agduduma a pananglais iti kinataoda.

Agngilngilangil met ti dua a sekyuritigard a mangbuybuya kadakuada bayat nga ibabbabada dagiti ramramit par…

POPCORN

Siguro maysa kadagiti nakaskasdaaw a banag ket ti popcorn. Manipud iti langana a kayumanggi ket agbalin a puraw. Kasungani ti kudil ti maysa a Filipino a no nagdalan iti pudot ket ngumisit. Manipud iti bassit ket no agdalan iti pudot ket dumakkel wenno lumobo. Kasta met ketdi ti biag manipud iti kinabassit no idumogtayo ti agtrabaho ket makaurnongtayo. Isarabasab ti bagi iti agduduma a puersa. Ngem ti pudot adu ti pagbaliwan ti maysa a banag. - Oct 12, 2014

Aritemtem

Ta uray ti padana
no matnag kenkuana
ket iyugesnati langana...
urnongenna ti bukodna
a pigsa sadanto
pagdanggayan a dua.

MANNANAKAW ITI DARIKMAT

Diak kayat ti agbasak iti ulimek ta agbalinak a traidor ket iti tunggal iyangadmo ta rupam maysaak a mannanakaw iti kanito addaan gamin dakulap ti kinatagari nga agbassawang iti kaaddak isu a tepteppelak ti gagarko batingtingenna ngamin ti kinabirhen ti tunggal darikmat ket ti anniniwanko tagikuaenna ti amin agraman dagiti banag a diak koma ipadlaw uray pay ti sang-awko a diak magawidan iti inna panagimbubukod ta nabara latta ti inna ipalgak ket amin dagitoy kagurgurak. Pakawanennak ita ta mangsingsingaak Namnamaem inton bigat  ken iti masungad pay nga aldaw Nakatallikudnakton!

TULOS

Pagkalatkatan 
dagiti agduduma a mula,
siwawaya, 
sipapakumbaba,
para kadagiti bumulbulod
iti sarrukod nga agpangato.

Lenguahe Ti Makina

Maysaak a pasurot,
Ti pindot, 
Ti kusilap
Ti tanaktak ti diding.

Maawatak ti garaw
Uray dagiti umel a makina
dagiti batingting,
ti kalangiking
ti landok.

Maawatak ti seniales
uray dagiti maris
agsapa,
ken agmatuon.

No kaano nga agsardengak
Ken no kaano nga aggarawak
diak pay maibaga,
ta agang-angesak!

Sarsarita - Sept 24, 2014

No addaka iti siudad kasla sapsapulem ti kaibatogam, 
awananka iti nagan, 
maysaka a tulnek, 
ket sakbay nga agbalinka nga uged, 
iridismo ti bagim, 
ti kararuam, 
uray pay kayatna a saw-en 
ket ti pannakaunas ti 
sabali.

Sarsarita -Sept 13, 2014

Maysaak siguro kadagiti tao a di manangayat iti nawara. Kunkunak iti bagik no kua, 

"Nawara la garuden ti biag, nayunak pay laeng ti panunot ken aglawlaw a padagsenen kadagiti banag a mabalin met nga urnosen ken idalimanet."

Pannakatay a Di Pumusay

Pannakatay ti kasapulan tapno agbalbaliw ti amin. Maysa a klase ti sakripisio a panangidaton iti bagi. Ti kinaalas ket agdalan iti nangatngato nga agpang tapno mabaliwan ti amin. 

Kasla maysa a bannuar, kinabannuar ti ipupusay. Ngem adda dagiti naparsua a saanna a kasapulan ti matay tapno agbaliw ti biagna, ti Kulibangbang!

Maturog, balkutenna ti bagina tapno iyadayona iti mata ti lubong. Iti managuyaw ken manangumsi a realidad. Ket iti maysa a bigat iyukradna ti makabaruannan a pigsa.

Danum ti Burayok

Ta saan amin a danum a naggapu iti burayok ket makaagas iti waw, adda gamin dagiti danum a numanpay nalitnaw ket awananda iti sustansia.

Sepilio

Kagurgurak ti sepilio
ta dalusanna
ti gapuanam
ugasenna ti sam-it
ti nagbinnuliganta

Prosa - 061214

Adda kadi nagan ti kuarta? No addanto, saanen a makuna a kuarta. Lumabasda iti dakulap a kas pamedped, wayawayaanna ti bagi, ti kararua, iti apagbiit, agbalin a paset ti inaldaw a panagbiag tapno bussogenna saan laeng a ti bagi, ti mata ngem ketdi ti agnanayon a pannakabisin

Panagbisita Iti Nabeddengan ti Manila Bay Ken West Philippine Sea

Nakadanonakon idiay Bataan ngem angingga laeng Balanga. Ket iti umuna a gundaway nakaaddakak met laeng iti Mariveles, ti nagrugian ti martia dagiti Filipino ken Amerikano a soldado idi Maikadua a Gubat ti Sangalubongan.

Diak ninamnama a ti papananmi gayam a lugar ket isu ti ungto ti kalsada no aggapuka iti sentro ti Mariveles. Maysa daytoy a lugar a madamada a tartarimaanen ken i-develop tapno agbalin a komunidad para kadagiti makunkuna nga "Addaan".

Iti gate pay laeng ti lugar ket naingeten ti panang-inspeksion dagiti guardia ta didaka pastreken no awan ti nakatimbre kadakuada a naganmo ken ti plate number ti nagluganam. Awan pay ti pampubliko a lugan tapno maluganan manipud iti main gate agingga't sentro ti Mariveles. Umabot pay iti 15 a kilometro ti taluntonem a kalsada.

Iti iseserrek iti nasao a pribado a lugar ket masungad dagiti agduduma Phase ti subdivision. Nalawa ti lugar a kas kunada agarup nasurok a tallo gasut nga ektaria daytoy. Kasla nagsubli ti regtak ken…

Iti Panagkunak

Iti panagkunak, addaan ramut dagiti dapanna
ket iti tunggal magna, imulana ti bagina iti daga
bay-anna ti lubong a mangtapaya

Iti panagkunak, no timudek a nasayaat iti nabayag,
makaparnuayak kadagiti ramut iti dapan a mangital-o iti daga,
ti panagsennay iti lawag, ket kutkotek nga isubli iti kasipngetan
iti tunggal addak.

Nakasangoakon kadagiti pinarsua a nangikari iti apuy,
iti gil-ayab ken pannakirisiris iti pannakauram.
Awan dudua, napuoran ti kaunggak ket nangibati
iti awan no di ketdi dapo iti kudilko.

Nariknakon ti pul-oy ti angin kadagita a tao, ti kinapigsa, ti apres - makalmes.
Makapabang-ar iti kararua no ikidemko, mariknak ti tunggal anges
iti rupak, ngem kanayon, kankanayon, ket no dadduma awanda met.
Kanayon nga ibatidak, ibatiandak iti pannakabibineg iti lugar a naginanaanda.

Iti panagkunak, maysaak a danum ket kankaayon a kasta.
Agayusak iti bukbukodko a diak ammo no sadino ti papanak,
lumsotak kadagiti birri, rengngat, kadagiti abut dagiti batbato,
sadiay a sapulek ti…

Biag ti Kapasanglay

Kasla met kapasanglay ti biagna, kasapulan a maregregan iti bulong tapno tummuar dagiti sabong, iyurayna ti panawen, ta saan met amin a sabong ket kaibatoganna ket busel, saan amin a busel ket maibilang a bunga. Ket inton agbunga dinanto matagikua dagita a bunga ta addaandanto iti bukod a keddeng, tumangkenda man iti puonna, maluoman ngem agbirri, saan a matinnag, adda dita a nakakapet, dida umibbet, rummuarto dagiti kapas a nabalkotan iti bukel, ipallais ti angin ket itundanna a kas awanan nagan ngem agtubonto met laeng a kas kapasanglay iti sabali a disso.

Prosa - 030514

TI NGAYED TI SIPNGET

manglimlimoka met a maysa,
kinunam "ipabpabulodko laeng ti pigsak,
iti kas kenkuana a nakapsut,
awanan gaway ken takrot",
ngem apay ita a bigat
kapadpadam ti langana
naglingedka kadagiti amur
iti sidong dagiti naiyanak nga agsapa,
ket inkul-obmo ti bagim iti likud ti bantay,
annogutem kadi lattan
a kaamakmo met ti sipnget,
wenno dika makalipat iti sipnget?
sibabaludka kenkuana?
diam maitarayan,
ta ita adda panagdudua dagiti pigsam,
ti pintas ti tunggal rangrang nga agdisso iti kataltalonan,
adda kadi pay ngayed ti inka iyallatiw manipud dita daya
agingga iti laud nga isu ti pagkadkadam
ket katakunaynaymo met ti maysa a takrot
paglanglanganyo met ti sipnget.

Prosa - 030214

...puraw ken nangisit laeng ti kangrunaan a maris,
 kas iti aldaw ken rabii ket dagiti naisupadi iti daytoy,
 isuda dagiti naidumduma a nangtallikud
iti sipnget ken lawag,
 iti pudot ken lamiis,
 aniaman a pimmanaw
iti ikub ti sirkulo
 makuna a kabusor,
 kabusor ti lubong.

Enjoying Iloilo (1)

Tapno ma-enjoymo ti maysa a lugar, kasapulan a mapanka kadagiti pasetna a daydayuen dagiti tattao.









Prosa - 010114

No kayatmo ti maysa a banag, ipukkawmo. Ket no kasapulan nga irupirmo, aramidem, uray no kaibatugan daytoy ket ti pannakatukkol ti batbatayam a sanga - tapno laeng maiwalin ti bulong a nakaballangan iti lawag. Mangabaruananka, aramatem daytoy nga aldaw tapno lumagto iti nangatngato pay a sanga. Makidangadang. Ipukkawmo a kayatmo ti agbiag. Surotem ti gundaway. Ket ikarim a tumayabka manen, tapno iti maikadua a gundaway maiyunnat dagiti nautoyan a payyakmo.