BOSS



No babaika ket sika ti akinkukua iti maysa a pagtrabahuan, ania ngata ti awagda kenka "boss" met laeng a kas pangawagda kadagiti lalaki? 

Dayta man to napaliiwko itay napannak nagitulod iti bombilia a maaramat iti maysa nga event sadiay SMX. 

Boss ti awagda iti maysa a babai a no kitkitaen ti langana ket kasla bagbagkatenna ti lubong. Nakakuretret ti mugingna. Addaan iti puli ti chinese. Ta no miraen ti matana ket singkit ngem no kudil ti pagsasaritaan amangan ta agpada kami laeng. Nauyong a kas natural nga ugali ti maysa a boss. Agallangogan ti timekna iti pakabuklan ti pasdek a no tantiaen ket umanay ti sangapulo a basketball court.

Bumugkaw kadagiti taona a puros bin-ig agtutubo. Diak la ammo no dagitoy ket addaandan iti 18 a tawen. Nararapisda ken tinubbuan ti taramidong dagiti kaadduan kadakuada. Agkakatawa a kasla nabibinegdan iti agduduma a pananglais iti kinataoda.

Agngilngilangil met ti dua a sekyuritigard a mangbuybuya kadakuada bayat nga ibabbabada dagiti ramramit para iti mapasamak nga exhibit. Awan kano pay minimum dagitoy nga uubing. Agasem ta nababbaba pay ngem minimum gayam ngem paitulokda a maibaba ti kinataoda tapno laeng makaawat iti kasta a gatad.

Binuybuyak ida agingga a nalpasda. Kinasaok ti bossda ngem nabababan ti timekna kaniak. Diak ammo no mabain ta pinauraynak iti guddua oras. Ket uray no cash koma ti saritaan tapno bayadanna ti balor ti bombilia, inawatko lattan ti cheke tapno makapanawakon kadayta a disso. Diak mairusok ti kasta a buya.

Ngem agurayak ulit manen. - # Oct 13, 2014
Post a Comment

Popular Posts