SILAP



Agawidakon manipud iti panakipagkita iti maysa a tao a mangiprosproseso iti building permit ti plano idi madalanak ti maysa nga aglaklako ti peanut butter iti igid ti kalye ti Karuhatan. Medyo dakkel ti lakona a naksiled iti plastik a garapon. Dinamagko ket kinuna a dina kano kukua. Kukua kano ti maysa nga empleyado it I uneg ti pawnshop. Binitbitko ti maysa ket napanak iti uneg. Tinawarak ket intedna iti 150. Nangiruarak ti pinapel a 200 ket sinupliannak met laeng iti pinapel.

"Dayta laeng kadi ti gatangem?", kinunana.

"Adda pay lakom, aya, a sabali?" dinamagko met.

"Ket gumatangkan kadagitoy alahas."

Idik laeng a nasaripatpatan dagiti agduduma a klase ti alahas a naremata ket nasiledda iti eskaparate. Adda singsing, aritos, kwentas, polseras. Aggi-innagawda iti silap iti tunggal maysa a kas pangipasindayag iti kabukbukodanda.

"Mabalin a tintinnagan." Innayon ti babai a pangallukoy.

"Kasano daydiay?" Inimtuodko ta itaak laeng a makakita iti kasta.

"Mangitedka laeng iti downpayment ket ti udim tinnagam iti dua bulan. Samonto laeng maala ti alahas no makompletomon ti udim."

"Mayat, a." Napintas a puonan. Kasla met laeng pangiprenda. Tintinnagam ti interest na.

Siniripko amin a kas panagpilik. Kasla agbiding iti bado. Wenno kas panagpili iti babai nga ayaten ken pakasaran. Kukuam iti agnanayon ket diamton maisubli pay. Napaisemak.

"Permi ti isemmo, sir. Singsing kadi to gatangem?"

"Saan. Amangan ta sipdutemda laeng. Aritos kunak para kenni baket." Tay adda batona a blue ti immuna a pinilik.

"Pangbaket dayta."

"Ket baket met ti pangitedak."

"Semiprecious laeng dayta a bato. Daytoy, ne. Maymayat." Intedna kaniak ti maysa nga aritos.

"Kasla met peke. Nagngisit!"

"Saan. Uray no itestingta ta batona ket makitam a pudno dagita."

"Sige, patienka, ngem itestingta nga agpayso, wen?"

Innalana ti aparato. Sinnaggaysana ti tunggal bato. Limmabaga dagitoy no mabatogan ti aparato. Babassit dagiti batona ngem agpayso a diamante dagitoy. Di ked ti diamante ket agnanayon. Ken saan a maputol daytoy iti aniaman a klase no di ket ti kapadana met laeng a diamante.

"Sir, kitam, agpayso ti kunak."

Nangiruarak iti pinangbayadko. Diak kayat ti matintinnagan isu nga in-cashko amin. Kayatkon nga iyawid a sibubukel.

"Dalusak pay tapno sumilap." Sa timmalikud.

Idi agsublin nasilapen ti alahas. Iparparammagna ti adda a ngayedna. Saan la gayam a makita ti langa ti maysa a banag iti akinruar a langa. - # Oct 15, 2014
Post a Comment

Popular Posts