Skip to main content

Posts

Showing posts from December, 2015

Daton

Adda areng-eng iti kada tedted ti dara
a maibisibis iti daga,
kas iti ling-et nga agayus iti muging,
saan a tumpuar nga awanan rason
ti bara saan a lumtuad iti katengaan ti lamiis
no di iruar ti puersa.
Ti daga a mawaw saan nga agriri
iti ania man a matnag kenkuana
Dina ibaga no naalsem, no naapgad.
Kaemenna ti maidaton a sisesegga
tapno iti maminsan pay pagsaipenna
ti birri, ti rengngat iti tengnga ti kataltalonan
Ket pagtaudenna ti baro a lasag.

Panangsala Iti Apoy

No makipinnerrengka iti apoy,
siguraduem a nakasaganaka iti barana.
ta addaan ngiwat daytoy
addaan dila a mangdilpat iti banag a nakaseksek.
Addaan iti mata a mangigop kenka a sibibiag.
Alun-onenaka ket tagikuaenna ti pigsam.
Kasla maysa a magneto a mangguyod iti bagim.
Maysaka a simutsimot nga agsalsala iti sardam
ket iti tunggal panagkayabmo, mauram ti payyakmo,
ti kararuam kukuanan.

Panagballasiw

Nadagsen kadi la unay ti bitbitbitem?
Ta pinasarabuanak iti agsasaruno
a sennaay iti nagtugawak.
Allawatek koma ti nabungon
a ginatangmo tapno itiponko iti supot
ngem imballasiwmo iti bangir a dakulapmo.

Nagbatiak tapno bantayak ti ginatangta
Iti bangir a paglakuan nga adda laeng
Iti batog ti naggatangam.

Manipud iti sarming, atiddog ti pila.
Agur-uray ti tunggal tao iti pannakeddengda.
Kas iti init a dina mabalin a lagtuen
ti laud manipud iti daya.

Kuminkinniten iti pingpingko
ti bara daytoy nga itay ket nakatangkayag laeng iti lulonak.
Masisirapak iti pigsana.
Ngem nabarbaraka.
Ad-adda a masisirapak kenka.
Wenno nakabaklay kadi kenka?
Ngem sabali ti init ta diak magawidan
iti ibaballasiwna manipud iti daya nga agpalaud.

Awan arimekmekmo a simmalpa iti lugan.
Ti laeng rarek ti makina ti nangpunno iti nagbaetanta.
Ket iti panangpatarayko,
dandanin diak nakita ti kawitan
a nangkamat iti upa a bumallasiw iti kalsada.
Dagus a nagprenoak.
Immuli ti daram iti rupam.

Ket agingga a nakadano…