Dagiti Lamok Iti Moskitero

Nasinga ti pannaturog ni Tata Carias idi makarikna iti kinnit iti pingpingna. Sinipatna ti bukodna a kannigid a pingping ket iti apagapaman nairidepna manen. Ngem apagbiit laeng ta napakulagtit idi adda manen nagdisso iti luppona. Nagkusay ngem kaskasdi a di agtalna ti agkaradisso iti kudilna. Inin-innayadna ti bimmangon ta amangan no mariing ni Nana Merced a narnekan iti abayna. Amangan ta maysa met a namsaakanen ti peste a lamok. Kasano a nakastrek dagiti lamok iti moskitero?

Iti kabayagdan a dua nga agasawa ita laeng a nakaraman iti kinnit ti lamok iti uneg ti moskitero. Ta ania aya ti serbi ti makuna a sapar kadagitoy nga insekto no makastrekda met? Bukibokendaka iti tengga ti panaginana tapno isublim ti pigsam. Nasisiyaat laengen no dikan nagusar. Wen naabotan daytoy a moskitero a mangipakita iti kabayagdan nga agasawa ngem nadait met daytoy a dagus. Kasla itay bigat a dida nagin-innuni a dua ngem itay addadan iti uneg ti moskitero ket bassit laeng a panagdeppel dagiti kudil ti nangsursi ti espasio. Nagpukaw a naminpinsan ti pasugnod.

Naminsan pay nga adda nagsaningsing. Innala ni Tata Carias ti ules ket isu ti pinangsipat. Rimmuar iti moskitero. Insindina ti silaw. Sinaggaysana a kinita ti uppat a paset ti moskitero. Dita adda nakitana nga abot a kas kadakkel ti gemgem. Nabirriat siguro iti panaglabas ti panawen. Simrek met laeng iti uneg ket pinandaganna ti pungan. Inton bigat mapanda gumatang kenni Nana Merced iti baro a sukat ti daan a moskitero. Kasapulan a masuktan a talaga. Kasapulanda a mapabaro ti saparda kadagiti lamok a mangdisturpar iti panaginana. Nadlawna a nagballikid ni Nana Merced ket inarakupna daytoy.


Popular Posts