Agbaliw met ti Panagraman


Saan a mapengdan ti panaglakay. Agbaliw amin pati ti inumen. Ta idi, umanayen ti ordinario a mainom tapno malipatan ti inaldaw a saksakiten ti bagi ken kissayan ti pampanunoten.

Iti panagdagasmi iti kaluklukat a Landers idiay Balintawak pinadasko met ti gimmatang kadaytoy puraw a kabalio a whisky (saan laeng a kanayon a nalabbaga a kabalio a kas idi kinaagtutubo). Nalaka iti panagkunak ta idi agtrabtrabahoak iti Liquor and Wine Shop ket isu latta met ti presiona. 17 years ti napalabas ngem awan nagbaliwanna iti presio. Kas kabalor ti sikat a brandy a Fundador Light. 

Saan met ketdi amin a nalaka ket nababa ti kalidadna ta iti umuna a panagsimsimko ket nalamuyot ti serrekna iti karabukob uray no awan unay yelo ti basok. Kunak no kumugtar ta kabalio met ti naikitikit iti naglaonanna. Naim-imas ngem J&B, Black Label, Jack Daniels wenno tay Ballantines. Iti udi ti baso adda angot ti prunes ken citrus.

Hay, sapay ta dinto mangibati iti sakit ti ulo no bigat. Ket maimasak met daytoy kagudduana a maymaysaak. Awan met kabadangko. (Ti sikreto ti whisky tapno dinaka tumbaen ket angotem nga umuna, simsimam, tilmonem ket ilukatmo ti ngiwatmo samo ipug-aw. Tay kaslaka dragon. ;) )

Post a Comment

Popular Posts