Ditoy Kuadrado A Siled




Ania ti adal nga ipasa
ti nakapupok a kalapati iti anakna?
A ti payyak, maysa laeng nga arkos
Ti bagi nga uray a putden
Ket agtubo latta a gagangay
Di met kasapulan iti inaldaw
Tapno iyunnat ti kettang
Ditoy kuadrado a siled
Kasapulam pay aya ti igges?
Wenno dagiti maregmeg
Nga imbati ti kallabes nga angep
An-annuem ti murkat
A natnag kadagiti bangketa,
Kadagiti pagayusan iti tunggal manglay-as
Ti di pay napinas a nakurukoran a kalsada
Makiinnunaka ketdin kadagiti mamirmiraut,
Kadagiti agsipsipayot iti agtatapaw a karne sadiay dan-aw
Ket adda met ited ni bossing
A tuktoken iti panawen man
Ti tikag wenno nepnep.
Agtalinaedka ketdi ditoy kuadrado a siled,
Paduolan babaen iti dakulap
Paaprosan ti katabtabas a dutdot,
Ta inton bigat likawem ti atep
No sinangpetan ni bossing iti derrep.



Post a Comment

Popular Posts